ကိုဗစ်ရောဂါကူးစက်ပြန့်နှံမှု ကြောင့်လည်းကောင်း၊ စစ်ကောင်စီမှ တရားမဲ့  အကြမ်းဖက်အာဏာသိမ်းခဲ့ပြီး နိုင်ငံမတည်မငြိမ်ဖြစ်နေသောကြောင့်လည်းကောင်း မြန်မာ့ပညာရေးသည် နှောင့်နှေးမှုများဖြစ်ခဲ့ရပါသည်။ မိဘပြည်သူများနှင့် ကျောင်းသားကျောင်းသူများအတွက် ကြီးမားသော ဆုံးရှုံးနစ်နာမှုများဖြစ်ခဲ့ရပါသည်။ အကြမ်းဖက်အာဏာသိမ်း စစ်ကောင်စီမှ ကျောင်းများဖွင့်လှစ်ခဲ့သော်လည်း နိုင်ငံအဝန်းမှ ကျောင်းသား ကျောင်းသူ ၉၀ ရာခိုင်နှုန်းကျော်သည် မိမိတို့၏ခိုင်မာသော ဆုံးဖြတ်ချက်များဖြင့် ၄င်းတို့ဖွင့်လှစ်သော ကျောင်းများတွင် စာရင်းသွင်း တက်ရောက်ခြင်းများ မပြုလုပ်ခဲ့သည်ကို တွေ့ရှိရပါ သည်။ ထို့ကြောင့်  အမျိုးသား ညီညွတ်ရေးအစိုးရ၊ ပညာရေး၀န်ကြီးဌာနသည် စဉ်ဆက်မပြတ် ပညာရေးများ ဆက်လက် သင်ယူခွင့်ရရန်အတွက် ဆရာဆရာမ၊ ကျောင်းသူကျောင်းသားများ၏စုပေါင်းညီညွတ်သောအားဖြင့် ကြိုးပမ်းဆောင်ရွက်ခဲ့ရာ ယခုအခါ အခြေခံပညာရေးနှင့် အဆင့်မြင့်ပညာရေးများကို ဖွင့်လှစ်နိုင်တော့မည် ဖြစ်ပါသည်။ သို့ဖြစ်ပါ၍ ပညာဆက်လက် သင်ယူခွင့်ရရန်အတွက် ကြားကာလအဆင်မြင့်ပညာရေးကို ဇွန်လအတွင်း ဖွင့်လှစ်သွားမည်ဖြစ်ကြောင်း လေးစားစွာ အသိပေး အပ်ပါသည်။